जुन्नर | दिनांक ३१ ऑगस्ट २०२५ – जुन्नर शहरात गणेशोत्सव आणि पैगंबर जयंती हे उत्सव शांततेत आणि उत्साहात साजरे व्हावेत, यासाठी हिंदू-मुस्लिम ऐक्य जपत सामाजिक सलोखा जोपासण्याचे आवाहन उपविभागीय पोलिस अधिकारी धनंजय पाटील यांनी नागरिकांना केले आहे.
शहरातील शांतता समितीची बैठक व पोलिस विभागातर्फे देण्यात येणाऱ्या ‘गणराया पुरस्कार २०२४’ वितरण सोहळ्यात ते बोलत होते. यावेळी विविध गणेश मंडळांचा सन्मान करण्यात आला, तसेच शांतता आणि सामाजिक ऐक्यासाठी योगदान देणाऱ्या संस्थांना गौरविण्यात आले.
मानाच्या गणेश मंडळांचा गौरव
अनंत चतुर्दशीला विसर्जन होणाऱ्या मानाच्या पंधरा गणेश मंडळांपैकी:
प्रथम क्रमांक: श्री नवतरुण सार्वजनिक गणेशोत्सव मंडळ, पणसुंबा पेठ
द्वितीय क्रमांक: खालचा माळीवाडा गणेश मंडळ
तृतीय क्रमांक: रविवार गणेश मंडळ
सातव्या व नवव्या दिवशी विसर्जन करणाऱ्या मंडळांपैकी खालील मंडळांना सन्मानित करण्यात आले:
राजमाता जिजाऊ महिला विकास मंच गणेश मंडळ
शिवयोद्धा गणेश मंडळ, कुंभारआळी
त्रिमूर्ती गणेश मंडळ, सराईपेठ
साई गणेश मंडळ, दिल्लीपेठ
या सर्वांना ट्रॉफी व प्रशस्तीपत्र प्रदान करण्यात आले. परीक्षक म्हणून विलास कडलक, के. जी. नेटके, विनायक रावळ, विनायक खोत आणि अतुल भगत यांनी काम पाहिले.
सामाजिक ऐक्यासाठी कार्य करणाऱ्यांचा सन्मान
कार्यक्रमात जश्ने मिलादुन्नबी ईद-ए-मिलाद कमिटी, जी अनेक वर्षे समाजात सलोखा राखण्याचे कार्य करत आहे, तसेच जुन्नर शहर पत्रकार संघ यांचा विशेष गौरव करण्यात आला.
तसेच, सलग १० वर्षे पोलिस दलासाठी गणेशोत्सव काळात पौष्टिक आहाराचे वितरण करणाऱ्या तनिष्का व्यासपीठाच्या गटनेत्या डॉ. उज्वला शेवाळे आणि त्यांच्या सहकारी वैष्णवी चतुर, अंजली दिवेकर, महानंदा हिरेमठ आणि सलमा सय्यद यांचाही सन्मान करण्यात आला.
कार्यक्रमाला मुख्याधिकारी चरण कोल्हे, विविध गणेश मंडळांचे पदाधिकारी, शांतता समितीचे सदस्य आणि स्थानिक नागरिक मोठ्या संख्येने उपस्थित होते.
उपविभागीय पोलिस अधिकारी धनंजय पाटील यांनी शेवटी सर्व मंडळांना व नागरिकांना एकत्रितपणे सलोखा व शांतता राखत उत्सव साजरे करण्याचे आवाहन केले.
