नवी दिल्ली: दिल्ली रेल्वे स्थानकावर शनिवारी रात्री झालेल्या चेंगराचेंगरीत १८ जणांचा दुर्दैवी मृत्यू झाला आहे. भारतीय रेल्वेच्या प्राथमिक तपासणीनुसार, प्रयागराजकडे जाणाऱ्या दोन गाड्यांमध्ये झालेल्या गोंधळामुळे आणि विशेष ट्रेनच्या घोषणेमुळे अचानक मोठ्या संख्येने प्रवासी एका प्लॅटफॉर्मवरून दुसऱ्यावर धावले, त्यामुळे ही दुर्घटना घडली.
रेल्वे अधिकाऱ्यांनी दिलेल्या माहितीनुसार, शनिवारी रात्री ९:१५ वाजताच्या सुमारास प्लॅटफॉर्म क्रमांक १४ वर प्रवाशांची संख्या अचानक वाढली आणि गोंधळ उडाला. दरम्यान, प्रयागराज एक्स्प्रेस ट्रेन रात्री १०:१० वाजता येण्याची अपेक्षा होती. मात्र, या ट्रेनच्या आगमनाच्या अगोदरच रेल्वेने विशेष ट्रेनची घोषणा केली, ज्यामुळे हजारो प्रवासी स्टेशनवर गर्दी करू लागले.
सूत्रांनी दिलेल्या माहितीनुसार, विशेषत:
कुंभ यात्रेकरूंसाठी असलेल्या या विशेष ट्रेनसाठी तब्बल २,६०० अतिरिक्त अनारक्षित तिकीटे विकण्यात आली होती. यामुळे प्रवाशांची संख्या नेहमीच्या तुलनेत खूपच वाढली आणि प्लॅटफॉर्मवर गोंधळ निर्माण झाला. या गोंधळामुळे प्रवासी प्लॅटफॉर्म १२ वर हलवण्यात आले, परंतु प्रयागराज एक्स्प्रेस तेथे असल्याची अफवा पसरली आणि त्यामुळे अचानक गर्दीच्या लोंढ्याने परिस्थिती अधिक बिघडली.
रेल्वे मंत्रालयाने या दुर्घटनेच्या चौकशीसाठी दोन सदस्यीय उच्चस्तरीय समिती स्थापन केली आहे. या घटनेच्या पार्श्वभूमीवर रेल्वे अधिकाऱ्यांची आपत्कालीन सुरक्षा बैठकही पार पडली.
ही दुर्घटना टाळता आली असती का?
व्यवस्थापनातील त्रुटी आणि गर्दी नियंत्रणासाठी असलेली यंत्रणा अपयशी ठरल्याचा आरोप प्रवाशांकडून केला जात आहे. तसेच, भविष्यात अशा दुर्घटना टाळण्यासाठी रेल्वे प्रशासनाने अधिक जबाबदारीने नियोजन करण्याची मागणी होत आहे.
Harshal Waghmare | Updated on: Feb 18, 2025 | 07:25 PM
